Novas

O Sindicato Labrego Galego chama a mobilizarse en A Coruña contra a firma do tratado UE-Mercosur

• 08,Xan 2026
• Posted By : Sindicato Labrego
• 0 Comments
• acordo ue-mercosur
• Agroecoloxía
• coruña
• mercosur
• mobilización
• tratado ue-mercosur
• UE-MERCOSUR

• O tratado ameaza a soberanía alimentaria e a viabilidade da agricultura familiar en Europa e América Latina.

• A mobilización, o luns 12 de xaneiro ás 12h en A Coruña, coincide coa data prevista para a firma do acordo.

Galiza, 8 de xaneiro de 2026. O Sindicato Labrego Galego-Comisións Labregas (SLG-CCLL) convoca unha concentración o vindeiro luns 12 de xaneiro, ás 12:00 horas, diante da Delegación do Goberno na Galiza en A Coruña (Praza de Ourense, 11. Ao lado do porto) para amosar o seu rexeitamento ao tratado de libre comercio entre a Unión Europea e o Mercosur.

A Unión Europea e os países do Mercosur están a piques de asinar un acordo que vende a soberanía alimentaria de Europa e América Latina e que se pretende pechar ignorando o rexeitamento maioritario da sociedade e do sector agrario.

O SLG, como membros da coordinadora internacional La Vía Campesina, sumámonos así ao rexeitamento que o movemento labrego está a amosar contra este tratado.

Denunciamos que este acordo beneficia os intereses das grandes multinacionais e do agronegocio, mentres ameaza a viabilidade da agricultura familiar e labrega a ambos os lados do Atlántico.

Defendemos unha transición agroecolóxica e a soberanía alimentaria. Este tratado vai en contra de ambas: pon en risco o acceso a alimentos saudábeis e prezos xustos.