Esta semana con carácter inmediato o SLG vai presentar diante da Valedora do Pobo unha denuncia para que se valore a forma de actuar da Consellería en canto ás incorporacións ao agro das mozas e mozos. Seguen sen resolverse as axudas da convocatoria de 2025 e estímase que arredor de 200 persoas quedarán fóra da de 2026.
Baixada do prezo na renovación dos contratos do leite: “Anunciamos que o luns 23 de marzo, ás 11h, faremos unha concentración diante da fábrica de Lactalis en Vilalba para amosarlle que o sector está totalmente en contra desta baixada”, sinalou María Ferreiro. “Nun momento de subida de custos é máis necesario que nunca que sigamos producindo alimentación no territorio, e esta Consellería o único que está facendo é cuestionar a Soberanía Alimentaria”, denunciou Brais Álvarez.
Lanzamos unha campaña de recollida de sinaturas coa proposta do SLG de cara ao período 2028-2034 da PAC, facendo fincapé en que as axudas teñen que ir destinadas ás persoas que producen alimentos.
Compostela, 16 de marzo de 2026. Esta mañá o Sindicato Labrego Galego-Comisións Labregas (SLG-CCLL) convocou unha rolda de prensa no local nacional da organización en Santiago de Compostela para denunciar diversas cuestións que afectan en grande medida á viabilidade das granxas galegas. Participaron na xuntanza a Secretaria Xeral do SLG, María Ferreiro, e o apicultor e Secretario de Acción Sindical do SLG, Brais Álvarez, quen comezou destacando que “o motivo desta convocatoria deriva da crise que vive o sector, que aínda que se queira ocultar dende as administracións, existe”. A preocupación respecto aos fondos destinados para as incorporacións ao agro das mozas e mozos que non cobren a demanda existente, a suba dos costos a raíz da guerra en Oriente Medio -como está acontecendo co gasóleo-, a postura do SLG respecto á PAC para o período 2028-2034 e a baixada do prezo do leite na renovación de contratos foron os temas principais que se debullaron.
Incorporacións
“Hai un mes e medio coñeciamos a través da prensa, sen ser a través de ningún órgano constituído, que a Consellería do Medio Rural non ía resolver as solicitudes de incorporacións de 2025 e que as ían pasar á convocatoria de 2026, situación que denunciamos no Consello Agrario do 20 de febreiro, onde ao mesmo tempo nos concentramos ás portas da Xunta”, lembrou Brais Álvarez. Tras iso, publicada na orde do 9 de marzo as axudas para este 2026, encontrámonos con que o presuposto é claramente insuficiente para dar aprobación a todas as solicitudes de incorporación que hai na actualidade.
O presuposto contemplado para o ano 2026 é de 23 millóns de euros, é dicir, 7 millóns máis que a cantidade aprobada inicialmente para o ano 2025. Cómpre resaltar que con estes 23 millóns teñen que aprobar as 380 solicitudes do ano 2025 e todas aquelas que se soliciten no ano 2026, que analizando as solicitudes e aprobacións dos últimos anos -cando no ano 2024 aprobaron 320 e o ano pasado solicitaron 380 estimamos- que no ano 2026 vai haber entre 350-400 novas solicitudes, o que nós fai pensar que moitas mozas van quedar sen esta axuda de vital importancia para iniciar novos proxectos e dar o relevo en moitas granxas. “Arredor de 200 persoas van quedar fóra”, explicou Álvarez.
Presentaremos o tema das incorporacións ante Valedora do Pobo
Dende o SLG-CCLL non temos constancia, polo menos no ámbito agrario, que unha administración convoque unha axuda como a de incorporacións do ano 2025 e despois non a resolva. Non imos deixar que isto quede así cando incluso non se está dando ningunha solución real nin cumprindo a promesa que se garantía no ano 2026 esa aprobación. “Preocúpannos as falsas promesas, vivimos nun momento no que en dez anos máis da metade das granxas van pechar e estas axudas son fundamentais para asegurar o relevo. Esta axuda é importante para avalar o proxecto ao inicio, no meu caso foi así cando comecei hai cinco anos”, afirmou o mozo apicultor. “Nun momento de subida de custos é máis necesario que nunca que sigamos producindo alimentación no territorio, e esta Consellería o único que está facendo é cuestionar a Soberanía Alimentaria”. Polo que, dende a organización, pedimos con carácter inmediato a resolución da convocatoria de 2025 e que se rectifique esta orde onde se inclúan fondos suficientes e, tamén, que non só se habiliten os plans de mellora para as persoas solicitantes que se incorporan, senón que poidan acceder a eles calquera granxa do territorio galego.
Esta semana con carácter inmediato o SLG vai presentar diante da Valedora do Pobo unha denuncia para que se valore a forma de actuar da Consellería do Medio Rural en canto ás incorporacións. “Os nosos servizos xurídicos están barallando a posibilidade de levalo á Xustiza para garantir que ningunha persoa moza que se queira incorporar en Galiza quede fóra das axudas. Non podemos permitilo como sociedade nin como medio rural”, resaltou Álvarez.
Renovación dos contratos do leite
A gandeira e Secretaria Xeral do SLG puxo de manifesto a situación preocupante que viven as produtoras e os produtores respecto á baixada dos prezos do leite. Os prezos que perciben as granxas galegas é dos máis baixos do Estado español, sendo Galiza o territorio con máis produción, arredor dun 42% do leite do Estado prodúcese no territorio galego. “A nosa media no último mes de ano foi de 0,52 céntimos/litro, cando en Castela e León -que e a segunda con maior produción pero moi por lonxe da nosa– os números estaban en 0,55 céntimos/litro, ou por citar outra que é Asturias, tamén con 0,55 céntimos/litro. Partimos dunha situación que é desigual”, advertiu a gandeira. A este contexto temos que sumarlle as malas novas respecto á baixada no importe a percibir por litro na nova renovación de contratos.
“Lactalis foi unha das empresas que lanzou a súa oferta a semana pasada onde encontramos unha baixada que vai dos 2 céntimos aos 5,5 céntimos por litro. Dende o SLG viñamos denunciando isto tanto no Consello Agrario Galego como no Observatorio do Leite”, dixo Ferreiro, enmarcando esta suba no contexto xeral de aumento dos custos de produción. “Co tema do gasóleo os datos para telos actualizados hai que miralos en diversos momentos cada día. Os prezos soben dun día para outro. A isto engadimos o tema dos fertilizantes e insumos que nesta época do ano son importantes para o abastecemento das granxas. Para nós hai un momento especulativo”, resumiu.
Pedimos a intervención urxente da Xunta, da Comisión Nacional de Mercados e da AICA
Por todo iso, dende o Sindicato Labrego Galego pedimos a intervención urxente da Xunta e da Comisión Nacional de Mercados e, en canto ao tema do sector lácteo e da renovación de contratos, tamén pedimos a intervención da Axencia de Información e Control Alimentarios (AICA), que é onde se ten que velar o marco contractual. “Con estas medidas concretas xa anunciamos que o luns 23 de marzo, ás 11h, faremos unha concentración diante da fábrica de Lactalis en Vilalba para amosarlle que o sector está totalmente en contra desta baixada”, informou Ferreiro.
PROPOSTA DO SLG PARA A PAC DO PERÍODO 2028-2034
Doutra banda, en canto á Política Agraria Común (PAC), o Sindicato Labrego Galego lanzou unha campaña de recollida de sinaturas coa proposta da organización de cara ao período 2028-2034 da PAC. A seguir o texto, que foi explicado está mañá en rolda de prensa polo Secretario de Acción Sindical do SLG, Brais Álvarez.
O pasado 16 de xullo de 2025 coñeciamos a proposta da Comisión Europea do marco financeiro plurinacional da Unión Europea para o período 2028-2034. A proposta, chegada dende a Comisión Europea en relación a PAC 2028-2034, tradúcese en menos presuposto (20% de recorte sen ter en conta a inflación, téndoa en conta falariamos de entorno a un 31% de recorte), ningunha ferramenta para a regulación dos mercados que permita subir prezos agrarios nin reducir a dependencia das axudas as granxas, as axudas seguen orientadas á terra e ao capital, non ás persoas labregas, mantense un enfoque produtivista e exportador, en detrimento da resiliencia e soberanía alimentaria e desmantela a política agraria común da UE coa supresión dos dous piares e a inclusión da PAC nun fondo multisectorial que fará que se compita con outros sectores por recursos económicos, así como o risco á renacionalización da PAC trae unha competencia á baixa entre os Estados membros aumentando as desigualdades entre agricultoras segundo o país onde vivan.
Consideramos dende o SLG-CC.LL que esta proposta aceleraría aínda máis a desaparición de pequenas granxas agrícolas, que son esenciais para a soberanía alimentaria europea, para un modelo de agricultura diversificado e para manter un medio rural vivo.
Dende o SLG-CC.LL demandamos unha PAC que contemple:
1- Un orzamento sólido para a PAC que garanta uns ingresos dignos ás persoas agricultoras e medios para a transición agroecolóxica. A principal solicitude nas manifestacións agrícolas en toda Europa o ano pasado era garantir uns prezos xustos para as persoas agricultoras. O orzamento da PAC debe incluír esta demanda, pero non só iso: as axudas da PAC deberán redistribuírse para apoiar ás pequenas granxas e promover a substitución xeracional e a transición agroecolóxica. A maioría das granxas necesita esta transición, polo que un orzamento sólido e clave para reverter esta tendencia e conseguir un modelo agrícola máis resiliente.
2- Rexeitamento á renacionalización, que ameaza a equidade e a cohesión europea. A PAC é un proxecto común, polo que unha maior renacionalización aumentaría a competencia entre as granxas agrícolas de todo o continente ao estar suxeitas a normas e axudas diferentes dun país a outro, aínda que formen parte do mercado común.
3- O mantemento de ambos piares, reforzando o piar 2 cara a transición agroecolóxica e o relevo xeracional. A desaparición do piar 2 equivalería a abandonar a vocación sistémica, alimentaria e rural da política agraria común. Lembramos que a UE non alcanzou ningún dos obxectivos da reforma de 2023 e tampouco logrou tres dos obxectivos que se fixaron no tratado de Roma de 1962: ingresos satisfactorios para as persoas labregas, prezos xustos para as consumidoras e mercados agrícolas estábeis. Esta situación é inaceptábel e a supresión do segundo piar só empeoraría a situación, xa que este piar permite contrarrestar os efectos devastadores do axuste dos pagos do primeiro piar da PAC á superficie, piar que consideramos debe ser modificado enfocado a produción de alimentos e o mantemento das granxas labregas en detrimento do pago por superficie como se contempla actualmente.
4- Un tope e unha degresividade das axudas reais, e que os pagos vaian para as pequenas e medianas labregas e para a produción de alimentos e o mantemento de granxas no territorio.
5- Unha revisión da OCM que inclúa instrumentos de regulación do mercado. Propoñemos afastarnos do paradigma actual da agricultura, que depende de subvencións públicas, para que os prezos agrícolas europeos se manteñan nun nivel estábel e por encima dos custos de produción, e supoñan estes a maior parte dos seus ingresos. Entendemos que os fondos do piar 1 deben ir encamiñados a garantir esta renda en tanto non se garanta por medios dos prezos, entendo a pac como unha ferramenta que axude a regular os mercados.
6- A revisión da Directiva sobre prácticas comerciais desleais mediante a inclusión na lista negra de prácticas comerciais as vendas por baixo dos custos de produción e a saída dos acordos de libre comercio e o rexeitamento do acordo UE-Mercosur actualmente en negociación.
Así mesmo consideramos que é necesaria unha verdadeira simplificación da PAC, cada vez máis difícil de entender e de xestionar. Os pagos directos disociados contemplados no PIAR 1 non poden seguir pagándose por hectárea en base a uns dereitos, deben ser unha verdadeira axuda a renda. Este sistema de asignación de pagos directos sobre a base da superficie conduciu a unha grande concentración dos pagos sen ter en conta os diferentes modelos agrícolas ou o nivel de renda. As axudas deben estar ligadas a actividade, non basearse en ningún caso en dereitos históricos e servir realmente para conseguir equiparar as rendas dos e das agricultoras a media da renda do Estado. Outro problema do modelo actual segue sendo que a axuda redistributiva complementaria á renda e á axuda para mozas vai tamén en función as hectáreas. Así, segue xerándose unha concentración dos pagos nas persoas ou grnaxas que xa cobran e nada nas que non teñen dereitos de pagamento. Na Galiza determinados sectores quedaron sistematicamente fóra destas axudas: horta, apicultura, viñedo….
A proposta do Sindicato Labrego Galego é o establecemento dunha verdadeira axuda á renda, eliminando todas estas axudas que complican moito a xestión. Propoñemos un só pago no PIAR I como axuda básica a renda, incrementado entre outros para as persoas instaladas na agricultura ou gandería nos últimos 5 anos, para persoas titulares dunha granxa nunha zona considerada de alta montaña, por ser muller, baremada en función da dedicación á actividade agraria por UTA e que teña en conta a Renda de Referencia para a actividade agraria. A actual PAC demostrou unha vez máis como non axuda a que o número de granxas ou o número de perceptores da PAC deixe de baixar. Se no ano 2013 en Galiza había 35871 perceptores de pago único, no ano 2018 había 27117 beneficiarios de pagos desacoplados e no ano 2025 hai 22462 solicitudes únicas.
As axudas teñen que ir destinadas ás persoas que producen alimentos, a tempo completo ou parcial. É precisa unha definición precisa de agricultor/a xenuíno ou xenuína: en ningún caso se considerará como tal o propietario ou propietaria dunha granxa intensiva sen terra, solicitarase un requisito de residencia e definirase agricultor/a a título principal e pluriactivo en función do porcentaxe dos ingresos na renda e do tempo que destina a actividade.
A axuda á renda contémplase como a compensación de renda dun determinado beneficiario individual ou sociedade (k) , calculada entre a diferencia da súa renda agraria (Rak), entendida como o rendemento neto reducido das actividades agrarias imputado na declaración do IRPF ou a atribución de rendas agrarias procedentes de sociedades con actividades agrarias, excluídas obviamente as subvencións, e unha determinada renta agraria de referencia (Rao) que actualmente fíxase polo Ministerio de Agricultura en 35924,10 €.
Dita diferenza corríxese, para que a compensación resulte xusta e eficaz mediante a aplicación de varios factores.
a) A dedicación do beneficiario (ak), medida como proporción dos ingresos agrarios sobre os ingresos totais consignados na declaración do IRPF, e a dedicación en horas a granxa. (máximo 1 mínimo 0).
b) A produtividade da granxa (bk), medida sobre un valor mínimo de produción e superficie por sector, sendo este valor 1, e minguando proporcionalmente cando non alcance este limiar ( máximo 1 mínimo 0).
c) A dimensión social da granxa (ck), medida pola súa contribución ao mantemento de granxas no medio rural, relevo xeracional, a presenza ou incorporación de mulleres titulares e a permanencia en territorios de especial relevancia para a conservación do medio como zonas de alta montaña ou red natura. (mínimo 1 máximo 1,5).
d) A contribución ambiental da granxa (dk) medida en relación ás prácticas medioambientalmente positivas e verificábeis como son a agricultura ecolóxica, facer pastoreo, a clasificación da granxa en extensivo ou semiextensivo….(mínimo 1 máximo 1,5).
e) Coeficiente de prorrateo (x): Que axusta a compensación en función da relación resultante entre a suma das compensacións individuais e a dotación orzamentaria dispoñíbel. Se esta última excedera o importe das sumas individuais caberían 3 posibilidades: 1) incremento da compensación individual aplicando o prorrateo 2) dotación dun fondo de reserva 3) traspaso ao segundo piar, como as axudas de incorporación ou plans de mellora.
A compensación por renda anulase cando a dedicación do beneficiario ou beneficiaria é cero e/ou a produtividade da granxa tamén. Desta maneira evítanse distorsións do sistema.
Este sistema supón a inclusión de todas as labregas na PAC, con independencia da súa orientación produtiva.
17 Abr 2026
16 Abr 2026
14 Abr 2026
8 Abr 2026
7 Abr 2026
6 Abr 2026