O Sindicato Labrego Galego (SLG) vén de rexistrar un escrito no que solicita á Consellería de Medio Rural (CMR) unha xuntanza con carácter urxente para poñer enriba da mesa a difícil situación que atravesan as granxas galegas por mor da seca e acordar medidas concretas que axuden a afrontala. Para o sindicato, o tempo pasa e a administración galega segue sen escoitar as demandas do sector nin avaliar a situación de risco que xa viven moitas granxas en todo o país.
Danos en carne, leite e horta
A seca xeneralizada, provocada por numerosos meses de precipitacións por debaixo da media xunto con episodios extremos de calor continuados, está a comprometer a viabilidade económica das granxas en todos os sectores. Na carne, a recollida de forraxes foi escasa e en moitos casos o pastoreo resultou inviable ata dous meses antes do habitual, o que agrava a situación porque moitas granxas xa están a consumir a forraxe reservada para o inverno. Comezan ademais a detectarse casos nos que o subministro de auga non chega a cubrir as necesidades do gando.
No leite, a menor recollida de forraxe súmase a unhas malas perspectivas na campaña do millo: a falta de choiva nos meses críticos para este cultivo reduce a súa calidade e cantidade, o que compromete a produción da vindeira campaña. Na horta e na apicultura, as colleitas menguaron en máis da metade e nalgúns casos non chegan sequera a desenvolverse, o que a medio prazo pon en risco a continuidade destes proxectos.
Un ano climático “do que hai que aprender”
Dende o SLG cualifican este como un ano “especialmente duro” a nivel climático. As fortes choivas de febreiro e marzo impediron entrar a traballar a terra nas datas habituais e, cando por fin se puido sementar, chegaron ondas de calor continuadas que non permitiron un desenvolvemento normal das colleitas. O sindicato sinala que se está a vivir “o verán máis caloroso da serie histórica” e alerta de que, dende hai unha década, cada verán tende a bater o récord do anterior, polo que reclaman traballar “en todas as frontes para adaptarnos ao futuro”.
Piden avaliación inmediata e medidas de fondo
No escrito rexistrado, asinado pola secretaria xeral do SLG-CC.LL, María Ferreiro Santos, o sindicato solicita con carácter inmediato unha xuntanza de traballo coa CMR para avaliar a situación e pór enriba da mesa posibles solucións que axuden a mitigar a “extrema situación de vulnerabilidade” que atravesa o sector. O SLG considera necesario establecer todas as canles de comunicación e interlocución posibles para facer fronte de xeito colectivo a esta situación e achegar solucións que permitan garantir a viabilidade económica do sector a curto prazo.
O sindicato solicita tamén unha valoración oficial, sector a sector, dos danos e perdas que a seca está a provocar e vai provocar a curto prazo, tendo en conta que xa hai granxas con problemas de abastecemento de auga e que en pouco tempo poden quedar sen alimento para o gando. O SLG esixe que estas circunstancias se aborden sen que supoñan un sobrecusto para as granxas.
A medio e longo prazo, o sindicato reclama dotar as granxas de ferramentas que lles permitan adaptarse e sobrevivir a episodios climáticos extremos, incluíndo liñas específicas para subvencionar investimentos que axuden a combater o cambio climático e a desintensificar a produción.
Alerta ante a especulación de prezos
O SLG amosa preocupación pola escaseza de alimento para o gando, que está a disparar o prezo de insumos como as forraxes. O sindicato alerta de que, en moitos casos, as granxas non poderán mercar herba ou millo, e as que o fagan farano asumindo perdas económicas moi importantes, unha situación que consideran insostible a medio prazo se estes episodios climáticos extremos se repiten de xeito sistemático.
11 Set 2026
9 Set 2026
8 Set 2026
7 Set 2026
1 Set 2026
24 Ago 2026