Novas

O Sindicato Labrego Galego, de loito por Javier Sánchez e Esther Latorre

• 10,Ago 2026
• Posted By : Sindicato Labrego
• 0 Comments

Dende o SLG queremos amosar as nosas condolencias e a nosa solidariedade coa familia e coas compañeiras da UAGA-COAG, ante o pasamento de Javier Sánchez e Esther Latorre, dúas figuras esenciais do mundo labrego aragonés.

O Sindicato Labrego Galego (SLG) quere facer chegar as súas condolencias e o seu abrazo fraterno á familia, achegados e compañeiras de sindicato de Javier Sánchez Ansó (1959) e Esther Latorre Larrodé (1960), falecidos este sábado en Tauste (Zaragoza).

Toda unha vida entregada ao labrego

Javier Sánchez foi agricultor de cereal e forraxe e socio fundador da cooperativa Agerca, de elaboración de queixos artesáns. A súa foi unha traxectoria sindical de décadas: chegou a secretario xeral da Unión de Agricultores e Gandeiros de Aragón (UAGA) en 1999, responsabilidade que mantivo ata 2010, ano dende o cal se ocupaba da organización na comarca das Cinco Vilas. Presidía dende 2001 a Cámara Agraria de Zaragoza e formou parte, en dúas etapas, da comisión executiva estatal da Coordinadora de Organizacións de Agricultores e Gandeiros (COAG), onde levou as áreas de Relacións Internacionais e Desenvolvemento Rural. O seu compromiso foi tamén internacional: representou a COAG no Consello Económico e Social Europeo e integrou a comisión executiva da Coordinadora Europea Vía Campesina.

Esther Latorre foi tamén agricultora e sindicalista activa na UAGA, con especial dedicación á Área da Muller, dende onde defendeu a igualdade de dereitos e oportunidades para as mulleres labregas e gandeiras. Xunto a Javier, criou as súas dúas fillas.

O SLG, en pé de loita coas compañeiras aragonesas

Dende o Sindicato Labrego Galego sabemos ben o que significa sosteñer, día a día, a defensa dun rural vivo e digno. Por iso sentimos como propia a perda que hoxe golpea ao sindicalismo agrario aragonés e europeo, e amosamos todo o noso apoio e cariño aos compañeiros e compañeiras da UAGA-COAG neste momento tan difícil.

Que a terra que tanto traballaron lles sexa leve. Até sempre, Javier e Esther.