A convocatoria terá lugar mañá 20 de febreiro ás 10h no Edificio EGAP da Xunta de Galicia (Escola Galega de Administración Pública) en Santiago de Compostela.
Postura do Sindicato Labrego Galego ante a proposta de acordo do Consello Agrario Galego no marco da proposición da comisión europea para a nova PAC (2028-2034).
Galiza, 19 de febreiro de 2026. No pasado mes de xullo deuse a coñecer por parte da Comisión Europea o borrador da nova Política Agraria Común (PAC) máis alá de 2028. A proposta tradúcese en menos orzamentos (20% de recorte sen ter en conta a inflación que podería situar o recorte arredor do 31%), ningunha ferramenta para a regulación dos mercados que permita garantir prezos agrarios dignos e reducir a dependencia das axudas as granxas -as axudas seguen orientadas á terra non ás persoas que producen alimentos- así como o desmantelamento da política agraria común da UE coa supresión dos dous piares e a inclusión da PAC nun fondo multisectorial que fará que se compita con outros sectores por recursos económicos. Ademais, o risco á renacionalización da PAC traerá unha competencia á baixa entre os Estados membros aumentando as desigualdades entre agricultoras segundo o país onde vivan.
Dende o Sindicato Labrego Galego-Comisións Labregas (SLG-CCLL) consideramos que esta proposta aceleraría aínda máis a desaparición de pequenas granxas agrícolas que son esenciais para a soberanía alimentaria europea, para un modelo de agricultura diversificado e para manter un medio rural vivo.
Neste contexto, nunha xuntanza convocada pola Consellería do Medio Rural co SLG-CC.LL, UUAA , ASAGA e Cooperativas a finais de xullo para tratar como afectaba esta proposta da PAC á Galiza, dende o SLG-CC.LL propuxémoslle a Consellería do Medio Rural crear un grupo de traballo específico sobre a PAC dentro do Consello Agrario Galego para traballar unha postura conxunta que trasladar á Comisión Europea e, así, tentar frear un recorte tan dramático para o noso país e traballar por unha PAC máis xusta.
A idea da creación deste grupo de traballo por parte do SLG-CC.LL, é tamén, para dotarnos como organización dun espazo onde trasladar á administración as nosas demandas como persoas labregas e poder ser escoitadas neste proceso. As persoas produtoras non poden ser excluídas deste tipo de decisións. Finalmente o Consello Agrario do 16 de xaneiro de 2026 aprobou a creación deste grupo de traballo en base a un texto previo. A comisión, constituída polo Director Xeral do FOGGA, a Subdirectora Xeral do FOGGA e un representante de cada organización agraria (SLG-CC.LL, UUAA e ASAGA), reuniuse poucos días despois para traballar un acordo previo que será aprobado polo Consello Agrario deste 20 de febreiro e que se remitirá á Comisión Europea, ao Goberno do Estado e ao Parlamento Europeo para mostrar o rexeitamento conxunto á proposta de PAC feita pola Comisión Europea en xullo e a proposta de modificación feita en novembro.
Que di a proposta de acordo conxunto do Consello Agrario?
Ante as distintas posturas que existen entre as organizacións asinantes e a propia Consellería do Medio Rural respecto á PAC, o noso obxectivo dende o SLG-CC.LL foi en todo momento acordar un texto que permitira rexeitar a totalidade da proposta feita polo Consello Europeo e asinar un rotundo rexeitamento dende Galiza ao novo Marco Financeiro Plurianual 2028-2034 onde se incluiría a futura PAC.
Tras o debate, o texto que se vai presentar no Consello Agrario do 20 de febreiro de 2026 recolle:
1- Traballar conxuntamente na defensa dos intereses do sector agrario e do rural galego ante a nova proposta da PAC posterior a 2027.
2- Rexeitar a redución orzamentaria proposta do montante dedicado á PAC para o novo período.
3- Desaprobar o desmantelamento do actual modelo da PAC baseado en dous piares.
4- Rexeitar este novo modelo que creará diferenzas entre os Estados membros e rexións ao deixar en mans dos gobernos as cantidades de fondos e porcentaxe de cofinanciamento destinados ás axudas da PAC.
5- Demandar unha PAC máis baseada na promoción da actividade agraria, concibida como un apoio á renda das persoas que realicen efectivamente unha actividade agraria, rexeitando que continúe cimentándose nun sistema baseado en superficies e dereitos históricos.
6- Esixir ao goberno o compromiso de que as melloras propostas pola Comisión Europea para o financiamento da PAC (reforma intermedia) que teñen carácter opcional para os Estados membros sexan implantadas no Estado español polo importe máximo permitido.
7- Insistir na necesidade da autoxestión rexional do programa de axudas, e que estes poidan ser adaptados á nosa realidade.
POSTURA DO SLG ANTE O TEXTO PROPOSTO Á VOTACIÓN NO CONSELLO AGRARIO DO 20 DE FEBREIRO DE 2026
Ante o texto formulado e despois dos debates que se deron no grupo de traballo impulsado por petición do SLG-CC.LL analizamos que:
1- Actualmente o que temos enriba da mesa é unha proposta da Comisión Europea formada por membros do Partido Popular Europeo (PP) e os Socialdemócratas (PSOE) moi prexudicial para os intereses das granxas galegas e que comprometen a súa viabilidade no futuro próximo, non respondendo ás necesidade das mesmas. É, por tanto, un obxectivo do SLG-CC.LL mostrar en Europa un rexeitamento amplo das granxas galegas a esta proposta, darlle visibilidade á nosa situación particular e amosar o malestar xeral que esta xera. O texto debatido no grupo de traballo amosa o rexeitamento de todas as asinantes á proposta feita dende Bruxelas e pode axudar a modificar a postura da Comisión Europea, aínda así somos conscientes que este acordo só ten validez para mostrar o rexeitamento nesta fase de negociación onde se está a debater a nivel de Bruxelas sendo necesario profundar no futuro como imos desenvolver estes puntos aquí.
2- O texto recolle de forma xenérica algunha das demandas históricas do SLG-CC.LL e da Vía Campesina Europa (ECVC) como a recollida no punto 5 da mesma, abrindo a posibilidade de camiñar cara a unha PAC que estableza unha verdadeira axuda á renda xunto coa promoción e protección da actividade agraria e das persoas que realmente habitamos o territorio e producimos alimentos. Nestes primeiros momentos é, para nós, un paso importante que se recoñeza, a nivel global, que a PAC non protexe ás persoas produtoras de alimentos nin é, actualmente, un sistema vantaxoso para as nosas granxas. Este punto ábrenos a posibilidade no futuro de loitar porque os pagos ás granxas sexan unha verdadeira axuda á renda das persoas titulares e a PAC serva para garantir uns prezos dignos e unha renda digna, aínda así temos que ter claro que o texto proposto só é un inicio.
3- Por último, o texto formulado ábrenos a porta a traballar por acadar unha PAC onde os Estados e as rexións pesen máis nas decisións e como aplicar as políticas agrarias no seu territorio. O texto abre a posibilidade a que Galiza teña un maior peso en decidir como se aplica esa PAC no seu territorio.
4- Aínda entendendo que este acordo entre a Consellería do Medio Rural, SLG-CC.LL, UU.AA e ASAGA é coa idea de facer chegar o malestar do sector agrogandeiro galego á Comisión Europea, para o SLG-CC.LL é o punto de inicio que debe guiar a implantación da PAC no noso país, e polo tanto, asinar este texto para remitir á Comisión Europea e ao Goberno español, non é un cheque en branco para a Consellería do Medio Rural, senón que ten que ser un compromiso de seguir a desenvolver estes puntos que consideramos vantaxosos para as granxas galegas e que necesitan ser traballados para materializalos en cuestións reais que se trasladen as granxas. Polo tanto a nosa sinatura ante o presente acordo está supeditada a un compromiso en firme de que a Consellería do Medio Rural siga á traballar neste grupo de traballo e desenvolver as propostas iniciais en medidas concretas.
En Santiago de Compostela, a 18 de febreiro de 2026.
A Executiva Nacional do Sindicato Labrego Galego-Comisións Labregas.
Descarga aquí:
14 Mar 2026
13 Mar 2026
12 Mar 2026
11 Mar 2026
10 Mar 2026
9 Mar 2026