
26/11/2012
Folga de entregas: “A pelota está no tellado da industria”
Tras máis de catro horas de negociacións, a folga de entregas do sector lácteo galego segue en marcha. Coa presenza das tres organizacións agrarias, as cooperativas, a industria e a distribución, e convocadas as partes pola Consellaría de Medio Rural, o 26 de novembro, seis horas antes de que comezase a folga de entregas convocada de maneira unitaria polo sector lácteo, tentouse chegar a un acordo de prezos que resultase positivo para todos.
Neste encontro houbo avances, como a vontade da distribución de pagar mellores prezos polo leite e deixar de utilizalo como produto reclamo; polo que, agora mesmo, tal e como dixo a secretaria xeral do Sindicato Labrego Galego, Isabel Vilalba, “a pelota está no tellado da industria”. En calquera caso, e de xeito indefinido, a folga de entregas segue en marcha.
