Compartimos con vós este estudo económico sobre o acordo comercial entre a Unión Europea e o Mercosur da autoría de Orsola Costantini e Alex Izurieta.
A análise do estudo mostra que unha vez que se consideren dinámicas económicas máis realistas, é pouco probábel que o acordo brinde os beneficios que prometen os seus partidarios. A avaliación das autoras é que:
➡️ As ganancias de crecemento proxectadas son insignificantes e poden desaparecer por completo unha vez que se teñan en conta as restricións fiscais, os efectos da distribución do ingreso e a concentración do mercado.
➡️ É probábel que as economías do Mercosur experimenten un crecemento máis lento, non máis rápido. Os recortes arancelarios reducirían significativamente os ingresos públicos nos países do Mercosur, onde os aranceis seguen sendo unha fonte importante de ingresos gobernamentais. Baixo as restricións fiscais existentes, é probábel que isto desencadee recortes no gasto público, o que conducirá a un crecemento económico máis lento en lugar da a expansión.
➡️ A UE vería escasos ou nulos beneficios para o crecemento. O aumento da competencia entre economías desiguais con grandes brechas salariais tende a exercer unha presión á baixa sobre a proporción dos ingresos das persoas traballadoras. O acordo podería dar lugar a un desprazamento de até 60 000 millóns EUR anuais dos salarios aos beneficios das empresas na UE unha vez que se aplique plenamente.
➡️ A desigualdade aumentaría. As pequenas e medianas persoas agricultoras, as traballadoras dos sectores expostos e as economías rexionais veríanse especialmente afectadas. Mesmo pequenas diminucións nos prezos de produción agrícolas poderían empuxar a miles de granxas agrícolas á vulnerabilidade económica, impulsando unha maior concentración da terra no sector agrícola e o dominio dos grandes agronegocios.
➡️ Reduciríase o espazo de políticas públicas e a capacidade dos gobernos para aplicar políticas económicas alternativas, o que limitaría a súa capacidade para xestionar as transicións económicas, sociais e climáticas.
➡️ As persoas consumidoras non se beneficiarían necesariamente de prezos máis baixos. Nas cadeas de subministración de alimentos altamente concentradas, é pouco probábel que os prezos de produción máis baixos se traduzan en alimentos máis baratos porque é máis probábel que as ganancias sexan capturadas polos grandes procesadores e comerciantes polo miúdo.
