A Soberanía Alimentaria, garantía de futuro

Menú Principal

Menú de Destacados

  1. Portada>
  2. Novas>
  3. Gandería>
  4. Esiximos ao Director Xeral de Gandaría solucións inmediatas para as eivas da campaña de sanemento animal

Esiximos ao Director Xeral de Gandaría solucións inmediatas para as eivas da campaña de sanemento animal

8 de Marzo do 2023

Saneamento

O SLG acompañou a gandarías afectadas na Terra Chá a unha xuntanza co Director Xeral de Gandaría, Agricultura e Industrias. Dende outubro granxas afectadas veén denunciando numerosas problemáticas vinculadas ás deficiencias do saneamento animal

O Sindicato Labrego Galego-Comisións Labregas (SLG-CCLL) acompañou onte a través da coordenadora comarcal da Terra Chá, Margarida Prieto Ledo, ás gandeiras Josefina Cillero Chao da Balsa (Muras), Henar Román Fernandez Labrada (Abadín) e Senén Lamelas (Fanoi) á entrevista concedida a solicitude do SLG-CCL para trasladar ao Director Xeral de Gandaría, Agricultura e Industrias, Silvestre José Balseiros Guinarte, os problemas que están a sufrir as explotacións por mor do prolongado mal funcionamento do servizo de saneamento animal.

As granxas da comarca levan organizándose e denunciando dende outubro do ano pasado unha situación que non só está a incrementar a súa carga de traballo e provocando un considerable aumento de custos e perdas, senón tamén infrinxindo un deterioro importante do medio debido á reducción da carga gandeira e ao cambio e manexo dos animais, conlevando o desprestixio das explotacións afectadas e incrementando as dificultades que impiden que a xente moza fique ou se incorpore á actividade agraria, acentuando o despoboamento das áreas rurais. Aliás, todo isto repercute tamén no estado de ánimo dos gandeiros e gandeiras, implicando nalgúns casos trastornos emocionais porque o sustento de moitas familias está en grave risco.

Nesta xuntanza, a Consellaría do Medio Rural admitíu que efectivamente está a haber un mal funcionamento da campaña de saneamento, e que así fora trasladado xa á empresa. As representantes das granxas afectadas presentaron unha batería de medidas concretas para subsanar a actual situación.

Solicitouse que a campaña de saneamento teña lugar entre abril e maio nas zonas de explotacións en extensivo; que se realice a proba comparada cando se faga a campaña; axilidade e rigor nos diagnósticos; o establecemento de vinculacións atendéndose á realidade do manexo das explotacións; informes detallados dos resultados das probas de todos os animais de cada explotación; unha axuda económica ás explotacións afectadas pola perda de rendibilidade e de ingresos; o establecemento de indemnizacións proporcionais ao valor de mercado dos animais sacrificados; a posibilidade de ter dúas ou máis barras no mesmo CEA cando os animais non se vinculen; que os animais en seguimento deixen de ter esta condición unha vez que pasen unha nova campaña e non sexan reaccionantes; que para considerar unha zona ou explotación de risco os antecedentes que se teñan en conta se baseen na positividade real dos animais, non en reaccionantes, e nun espazo de tempo non superior a dúas campañas; que en igualdade de condicións sanitarias se teñan as mesmas normas para as explotacións afectadas e que as granxas inmobilizadas podan mandar os xatos para calquera cebadeiro.

Das propostas realizadas polas gandeiras e gandeiros asisitentes á xuntanza, Balseiros comprometeuse a que a partires dagora as campañas se fagan na primavera, que é a época máis idonea, e quedou en estudar a posibilidade de que as/os gandeiras/os teñan acceso a todos os resultados das probas online na oficina virtual, en lugar de ter que pedilo cada gandeiro como está a acontecer na actualidade.

A Consellaría tamén se comprometeu a valorar poder facilitar ás gandeirías información do historial sanitario dun animal, antes de mercalo e incorporalo, así como a actualizar as vinculacións entre as propias gandeirías, dado que as actuais non se corresponden coa realidade.

Non resultou sen embargo receptivo o Director Xeral de Gandaría ante a proposta de que se active unha solicitude de axudas para compensar a estas explotacións, inda que dixo que se comprometía a valoralo, ao tempo que informou de que por parte do Ministerio estanse a revisar os varemos de indemnización.

Dende o Sindicato Labrego Galego seguiremos acompañando ás gandeiras e gandeiros afectados e dirixíndonos a tódalas instancias administrativas pertinentes até que sexan solventadas as numerosas deficiencias do servizo de saneamento animal.