A gandeira e Vicerresponsábel do Sector Leiteiro no Sindicato Labrego Galego-Comisións Labregas (SLG-CCLL), Ana Rodríguez, e o coordenador do sector, Xulio Fernández, participaron na mañá de hoxe en Santiago de Compostela canda representantes da Asociación Galega de Cooperativas Agrarias (AGACA), a Asociación Agraria de Galicia (ASAGA), Federación Rural Galega (FRUGA) e Unións Agrarias (UUAA) nunha rolda de prensa conxunta para presentar análises e propostas que poñan fin dunha vez por todas á venda a perdas das granxas galegas.

Como salientou a gandeira Ana Rodríguez, atopámonos nun momento de renovación de contratos entre granxas e industrias, “e coa situación de incerteza e constante suba de custos de produción, esas renovacións deben garantir que se cubren os custos”.

A vicerresponsábel do sector leiteiro no SLG incidiu tamén en que “son as pequenas granxas, precisamente as de modelo familiar e que contribúen de xeito especial á fixación de poboación no medio rural, as que están a saír máis perxudicadas nos prezos asinados, e non é que sexan as que peores resultados teñen, se non que son ás que menos se lle paga, que é distinto”.

Asemade, para abordar de xeito estructural o problema da escalada de custos de produción, Rodríguez recordou que dende o Sindicato Labrego Galego levamos décadas “insistindo na necesidade dun modelo menos dependente da importacion de insumos, que en momentos coma este amosan a debilidade do modelo actual, e que pode traer como consecuencia o peche de moitas granxas, ademais de dificultar que os pobos podamos ter garantida a nosa Soberanía Alimentaria, ao facernos dependentes de insumos do exterior”.

Dende o SLG-CCLL instamos asemade ao conselleiro de medio rural, José González Vázquez, a cumprir co compromiso contraído na xuntanza mantida o pasado 18 de febreiro ao respecto da publicación a curto prazo de índices oficiais de custos de produción no sector leiteiro.

AGACA, ASAGA, FRUGA e UUAA subscriben así mesmo a táboa reivindicativa (adxunta) baseada nos puntos propostos polo Sindicato Labrego Galego-Comisións Labregas no pasado mes de novembro chamando á unidade de acción sindical; batería de medidas que, reiteramos, son de imprescindíbel aplicacion para que as solucións á crise do sector leiteiro sexan reais, non só análises que fican flotando no ar logo de cada xuntanza ca Consellaría do Medio Rural.